எமது மலையகம்

மலையகம்

பச்சை உடை உடுத்திய மேனி

எழில் கொஞ்சும் அழகு

அதிசயத்தின் மற்றையயொதொரு அற்புதம்

அதுவே எங்கள் மலையகம்

நீரை தரும் நீரோடை

பசியை போக்கும் நாவல்

கிளிதட்டு விளையாட்டு

அதுவே எங்கள் பொழுதுபோக்கு

வெண்மை ஆடை அணிந்த மாணவர்கள்

செய்யும் குறும்புக்கு முடியவில்லை

கண்டு களித்து இன்புற நேரமில்லை

இதுவே எங்களுடைய வேலைச்சுமை

குன்றும் குழியுமான பாதைக்கு

புனரமைப்பு என்ற சொல் உதயமாகவில்லை

கள்ளங்கபடமற்ற மனதையுடைய மக்கள்

மலையகம் கொண்டுள்ள அவலம்

தினமும் பொழுது புலர்ந்ததும் வேலை

நாள்முடிவில் ஒப்பாகாத சம்பளம்

தேவையை எப்படி பூர்த்தி செய்வது என்ற ஏக்கம்

இதனுடன் வாழ்க்கையை நடத்துகிறோம்

எழுத்தறிவு இருந்தும் வேலை இல்லை

தளிர் கிள்ளும் வேலையே எஞ்சியிருக்கும்

எவ்வளவு காலம் தான் ஒளியற்ற கூட்டினுள்

சிறையடைந்து தவிப்போம்

எங்களை பற்றி யோசிக்க யாருமில்லை

தட்டி தோள் கொடுக்க எவருமில்லை

கஷ்டத்தின் மத்தியில் தூங்குகின்றோம்

நன்மைபயக்கும் விடியல் தோன்றுமென்று

சுடர்விட்டு எரியும் ஒளிச்சுடராய்

உறுதியை மனதில் திடமாகக்கொண்டு

முதலாளி வர்கத்தை உடைத்தெறிந்து

இருண்ட சிறையிலிருந்து விடுபடுவோம்

வர்ணிக்க இனி வார்த்தை இல்லை

தமிழ் இலக்கணம் போதவில்லை

கல்வியின் தாய்க்கு மதிப்பளித்து

என் கவிதையினை முடிக்கின்றேன்